IT мамандықтары студенттерінің мансаптық дайындық деңгейін арттыруға бағытталған жоғары математиканы оқытудың жасанды интеллектімен күшейтілген курсын әзірлеу

Аңдатпа

Бұл мақалада ақпараттық технологиялар бағытындағы студенттердің математикалық, аналитикалық және цифрлық құзыреттерін  жан-жақты дамытуға арналған жасанды интеллектімен күшейтілген жоғары математика курсын әзірлеу және оны оқу үдерісіне енгізу әдістемесі толық сипатталады. Курс мазмұны жоғары математиканың негізгі бөлімдерін (сызықтық алгебра, математикалық талдау, ықтималдықтар теориясы мен математикалық статистика) ІТ саласында жиі кездесетін қолданбалы міндеттермен тығыз ықпалдастыра отырып құрылған. Оқу  барысында машиналық оқыту модельдерін математикалық негіздеу, деректерді талдау әдістері, есептеу алгоритмдерін оңтайландыру, статистикалық болжамдау әдістері қарастырылады. Бұл интегративті тәсіл студенттерге теориялық білімді нақты кәсіби міндеттерде тиімді қолдануға мүмкіндік береді.

Оқыту арнайы әзірленген модульдік цифрлық платформа арқылы жүзеге асырылады. Платформа студенттің оқу барысындағы барлық әрекетін (жауап беру жылдамдығы, қателердің сипаты, тапсырмаға жұмсалған  уақыт, қосымша материалдарды пайдалану қарқындылығы) талдап, осы деректер негізінде тапсырмалардың күрделілік деңгейін автоматты түрде реттеп отырады, жекелендірілген түсіндірмелер, адаптивті ұсыныстар және қосымша оқу ресурстарын ұсынады. Мұндай жасанды интеллектімен күшейтілген тәсіл оқу үдерісін жекелендіріп, студенттердің ішкі мотивациясын едәуір арттырады.

120 студент қатысқан педагогикалық эксперимент нәтижелері курстың жоғары тиімділігін айқын дәлелдеді: эксперименттік топтың қорытынды тестілеудегі орташа балы бақылау тобына қарағанда 22 %-ға жоғары болды, ал математикалық білімді практикалық ІТ-міндеттерді шешуде қолдануға деген сенімділігі 35 %-ға өсті. Алынған нәтижелер жасанды интеллектімен күшейтілген математикалық курстардың болашақ ІТ мамандарын кәсіби даярлаудағы әлеуеті өте жоғары екенін растайды.