Қазақстандағы университеттік көшбасшылық: сапалық тұрғыдан зерттеу

Аңдатпа

Мақалада Қазақстандағы университет көшбасшылығы және ұйымдастырудағы өзгерістерді сапалық тұрғыдан зерттеу әдіснамасының қиындықтары мен шешімдері қарастырылады. Зерттеуде өңірлік үш мемлекеттік университеттегі кейс-стадийлер негізге алынып, сапалық зерттеу дизайнының посткеңестік кезеңдегі мұралардан, мемлекеттік реформалардан, институциялық дербестік, интернационалдандыру және ұйымдық трансформациялардан қалыптасқан жоғары білім беру контексінде қалай  құрылымдалғанына баса назар аударылған. Зерттеуде университет ректорларының, проректорлардың, директорлар кеңесінің мүшелерінің, декандар мен мемлекеттік органдар өкілдерінің институциялық өзгерістерді қалай түсіндіретінін зерделеу мақсатымен жартылай құрылымдалған сұхбаттар, фокус-топтар және құжаттарды талдау әдістері қолданылған. Мақала Қазақстандағы университет көшбасшылығын сапалық зерттеу әдіснамалық икемдікті, контекске терең бойлауды, жүйелі триангуляция мен зерттеушінің ұстанымына рефлексивті қатынасты талап ететінін нақты көрсетіп береді.